இந்தியாவில் தினமும் லட்சக்கணக்கான மக்கள் ரயில்களில் பயணம் செய்கின்றனர். ரயில் பயணம் என்பது ஏழை மக்கள் முதல் நடுத்தர மக்கள் வரை அனைவரும் செல்லக்கூடிய மலிவு விலை போக்குவரத்து வசதியாக உள்ளது. இதில் டிக்கெட் செலவு குறைவுதான். ஆனால் வசதிகள் அதிகம். ரயில்களில் வேகமாகவும் பாதுகாப்பாகவும் பயணிக்கலாம். அதனால் தான் நிறையப் பேர் ரயில் பயணத்தை விரும்புகின்றனர்.
“IRCTC இணையதளம் தற்போது செயலிழந்துள்ளது, மேலும் பயனர்களால் உள்நுழையவோ அல்லது தங்கள் டிக்கெட்டுகளை ரத்து செய்யவோ முடியவில்லை. IRCTC ரத்துசெய்தல் மற்றும் TDR தாக்கல் செய்வதற்கான ஃபோன் எண்களை வழங்கியுள்ளது. ஐஆர்சிடிசியின் இணையதளம் இன்று காலை தட்கல் டிக்கெட் முன்பதிவுக்கான உச்ச நேரத்துடன் இணைந்து செயலிழப்பை சந்தித்தது.”
ரயில் பயணம் செய்ய டிக்கெட் முன்பதிவு செய்வது அவசியம். ஆன்லைன் மூலமாக டிக்கெட் முன்பதிவு செய்வோர் அதிகம். அதுவும் தட்கல் முறையில் அதிகப் பேர் டிக்கெட் புக்கிங் செய்கின்றனர். ஆனால் அவ்வாறு புக்கிங் செய்யும் போது பலமுறை பிரச்சினை ஏற்படுகிறது. சர்வர் பிரச்சினை, தொழில்நுட்பக் கோளாறுகள் போன்ற பல்வேறு காரணங்களால் பயணிகளால் டிக்கெட் புக்கிங் செய்ய முடியாம்ல் போகிறது. இந்தப் பிரச்சினை அடிக்கடி நடக்கிறது.
ஐஆர்சிடிசியின் இணையதளத்தில் டிக்கெட்டை முன்பதிவு செய்ய நினைத்த மக்களுக்கு இன்று பெருத்த ஏமாற்றம் ஏற்பட்டது. ஐஆர்சிடிசி தளத்தில் இன்று காலை பராமரிப்பு பணிகள் நடைபெற்று வருவதாக ஒரு செய்தி தளத்தில் காட்டப்பட்டது. அடுத்த 1 மணி நேரத்திற்கு இணையதளம் மூலம் ஆன்லைன் முன்பதிவு இருக்காது என்று கூறப்பட்டது. ஐஆர்சிடிசியின் சேவை செயலிழந்த பிறகு, பல பயனர்கள் புகார் அளித்துள்ளனர்.
இரவு நேரங்களில் பராமரிப்பு பணிகள் நடப்பது அடிக்கடி காணப்படுகிறது. ஆனால் தற்போது பகலில் இவ்வாறு நடந்திருப்பது ஒரு வகையான சைபர் தாக்குதலாகவும் இருக்கலாம் என்றும் கூறப்படுகிறது. இது தொடர்பாக பல பயனர்கள் எக்ஸ் தளத்தில் பதிவிட்டு புகாரளித்து வருகின்றனர். அதில் பயனர் ஒருவர், “#IRCTCயில் ஏதேனும் மோசடி நடக்கிறதா? கடந்த 1 வாரமாக தினமும் காலை 10 மணிக்கு மேல் டிக்கெட்டை புக்கிங் செய்ய முயற்சிக்கிறேன். என்னால் முன்பதிவு பக்கத்திற்கு கூட செல்ல முடியவில்லை. இணையதளம் செயல்படவில்லை. ஆப் செயல்படவில்லை. என்ன பிரச்சினை?” என்று கேள்வி எழுப்பியுள்ளார்.
ஒரு மணி நேரத்திற்கும் மேலாகியும் இன்னும் இணையதளத்தால் கேப்ட்சா குறியீட்டைக் கூட ஏற்க முடியவில்லை. என்ன ஆச்சு என்று நிறையப் பேர் கேள்வி எழுப்பியுள்ளனர். இன்று காலையில் ஆயிரக்கணக்கான பயனர்கள் வலைத்தளத்தைப் பயன்படுத்துவதில் சிக்கல்களை எதிர்கொண்டனர். இணையதளம் செயலிழந்துள்ளதாக பயனர்கள் தொடர்ந்து புகார் அளித்து வந்தனர். தற்போது டிக்கெட் புக்கிங் சேவை இயல்பு நிலைக்குத் திரும்பியுள்ளது.
